De Hel van 27
Dr heerst al joaren in Fraisland ‘n mediterroane temperatuur
Wat doun wie mit al ons geld, docht het Fraise Elfsteden-bestuur
Mor eindelijk het is zo wied, de groode dag is doar.
Dr komt weer een Elfstedentocht veur t eerst in 30 joar
Veur t eerst in 30 joar, de tocht der tochten wordt weer reden
Rayonheufden binnen ainsgezind en apmoal dik tevreden
Want alles is bevroren, en t ies is overal dik genog
Dus minsen “It giet oan”, eindelijk mor toch
It giet oan
Veur al dij scheuvellopers en ik wait nait houveul publiek
Werd alles oet de kast hoald, veural qua koeltechniek.
Biogasinstalloatsies, windmeulens, zunnepaarken
Een ongekende Tour de Force, van wilskracht en soamenwaarken.
Ze hebben het flikt, Meroakel, t is een winters paradies
Mit dikke koelmachines ligt hail Fraisland onder t ies.
n Stuk of wat dikke scheuren binnen kunstmoatig prepareerd
En mit snijkanonnen oet Zwitserland wordt stoefsnij produceerd.
In Ljouwert stoan ze kloar, de scheuvels oet het vet
Per 1000 goan ze los, op n loopje noar de Zwette.
Doar de schounen oet, en scheuvels onderbonden,
Spanning en sensoatie, t langverlangde is begonnen.
Dr stait nog nait veul volk bie kaant, dat ligt nait aan de kolle,
Nee ze stoan nog in de file, achter aansloeten bie Zwolle.
Ook binnen zo hier en doar al dikke parkeerproblemen
Al was t advies om thoes te blieven of bus of train te nemen.
De eerste rieders binnen in Sneek, lekker veur de wind ja
En broezend op de brandstof van hun vrouge bordje Brinta
Moar onderwegens noar IJlst, tussen stempel ain en twij
De eerste groode hindernis, dikke bulten snij.
In alle koelcellen van het land binnen iesblokken produceerd
En onder min twintig groaden noar Sloten transporteerd
Dankzij dizze actie ligt Slotermeer nou grotendails dicht
t Wordt wel even stevig deurklaauwen, t ligt nait aal te slicht
Dr is al flink wat touloop, aan weerskanten van De Luts,
Lu mit pompeblèren sjawl en oranje Unox-muts.
De Luts is nogal smal en dat geft n bult malheur,
Dikke valpartijen deur een overlangse scheur
Hier worden din ook de allereerste oetvallers noteerd
Materioalpech, gebroken bainen, nee nait veul blieven ongedeerd.
EHBO-post wordt deur Hooligans vakkundig verreneweerd
En n bloarenprikkende hulpverlainer deur drij man molesteerd
Nog even veur de wind aan, din binnen ze in Stavoren
Vervolgens via Hindeloopen gestoareg aan noar t noorden
t Wemelt hier in Zuudwesthouk van de AirBNBs
Ain boer verhuurt zien hounderhok “mit oetzicht op t ies”
Wat zugt dij Erben Wennemars in Workum graauw om snoet
Zien b-b-bordje Brinta komt der net zo haard weer oet!
Burgemeester Buma stait bie Bolsward in de bocht
Hai is n beetje snötterig, stond té laank op de tocht
Dat het hoalen van n stempel in Harlingen hail wat muite kost
Komt van aal dij lu dij op foto willen mit hun idool bie de stempelpost
Of op de voest mit Dolle Dries, dij werd mie doar toch helleg
mor verder bleef het hier over t algemain in Harlingen wel gezelleg
Ook Blauhúster Dakkapel – lait weer ais van zich heuren
Ze waren al n zetje stopt mor dit mos toch wel even gebeuren
Carnaval in Fraisland, dat is n feest mit pit
En zulfs Iesmeester Kroes zingt fanatiek zien deuntje mit
Zoals:
Mien woar is mien feestneus, n peerd stond in de gang
Mien tante het n eulifant, mien va schreef op t behang
De klokken van Arnemuiden, dij luuden “Welkom thoes”
Zak es lekker deur, en wie goan nog nait noat hoes.
Noa Franeker wordt het ies al gaauw van mindere kwaliteit
En is het kluunen bie elke brug over Heugafelt tapijt
Omdat op t hoogbaalkje bie Bartlehiem te waineg minsen konden
Hebben ze dij vervangen deur n dubbeldeks betonnen
In Dokkum verrekt veul oetvallers, en noaderhand wat bleek?
Dij hadden zich nait goud insmeerd en kregen last van zunnesteek!
Stempelpost is nou dicht, t ies werd veuls te dun
t Ainege dat je nog kriegen kinnen doar is n likje after sun
D’r binnen dattig man deur ’t ies hèn zakt op de Dokkumer Ee
Bie de kouk en zopie doar dus din mor noar t café.
Mor ook hier lopt t oet de hand, – dikke overlast
Messchain van al dat bier, of dr zat wat in de Kwast
Aine Wopke had in zien rugzak een Delftsblauw tegeltje mit
Om dij doalek onder tegeltjesbrug vast te plakken mit bisonkit
Al was e n poar keer vallen, de tegel was nog geef
Hai het hom onder brug hin plakt onder d oetsproak It Sil Kleve
Kiek oet! Geheime stempelpost, doar aan kaant in t rait
Gonnent dij dizze missen, kriegen t kruuske nait
Nou nog t leste stukje, op noar de Bonkevoart
Veur allerleste stempel en n volle stempelkoart
Mor t leste stukje van de tocht lukt op scheuvels nait
Veur de hel van 27 was het n tikkeltje te hait
Nog gain 2% van scheuvellopers dij dr aan begonnen
Het de finish zwemmend hoalt, een Van de Weide het m wonnen.
CREDITS
Tekst: P. de Haan / F.J. den Hollander
Muziek: P. de Haan
Onderdeel van de Mit 45 deur de bocht-toernee, 2025